Ngjarja organizohet në bashkëpunim me Ambasadën e Republikës së Kosovës në Austri dhe shënon një hap të rëndësishëm në zgjerimin e këtij festivali përtej kufijve të Kosovës.

Në një takim zyrtar të zhvilluar në ambientet e ambasadës, i ngarkuari me punë i Kosovës në Austri, Albinot Bimbashi, priti përfaqësuesit e festivalit, përfshirë menaxherin për Austrinë Michael Stoeger, drejtoreshën ekzekutive Ganimete Sava dhe drejtorin artistik Burim Haliti. Në këtë aktivitet do të performojë edhe pianisti Unik Ukshini, duke i dhënë mbrëmjes një dimension artistik shtesë.

Sipas organizatorëve, festivali ka njohur sukses të jashtëzakonshëm në Kosovë dhe në arenën ndërkombëtare, duke u fokusuar në promovimin e filmave që trajtojnë tema sociale, përfshirëse dhe inspiruese. Një nga momentet kulmore të mbrëmjes në Vjenë do të jetë shfaqja e filmit të shkurtër kosovar “Sara”, prodhim i vetë festivalit.

Programi në Austri pritet të përfshijë një përzgjedhje filmash të shkurtër nga vende të ndryshme, të cilët janë vlerësuar në edicionet e mëparshme të festivalit. “Art Without Limit” njihet për promovimin e diversitetit, përfshirjes dhe fuqizimit përmes artit filmik, shpesh duke vënë në pah histori të personave me aftësi të kufizuara dhe sfidat e tyre në shoqëri.

Festivali udhëhiqet nga një ekip me përvojë në industrinë e filmit dhe menaxhimit kulturor, ku rolin kyç e kanë drejtoresha ekzekutive Ganimete Sava dhe drejtori artistik Burim Haliti, të cilët kanë kontribuar në ndërkombëtarizimin e platformës dhe në rritjen e cilësisë artistike të programit.

Ngjarja do të mbahet më 1 maj në Quartier Wolkersdorf afër Vjenës (Kirchenplatz 1A, 2120 Wolkersdorf im Weinviertel). Hapja e dyerve dhe ekspozita do të fillojnë në orën 16:30, ndërsa shfaqjet e filmave në orën 18:30.

Ky edicion në Austri pritet të shërbejë si një urë kulturore mes Kosovës dhe skenës artistike evropiane, duke i dhënë më shumë hapësirë promovimit të kinematografisë kosovare dhe ndërkombëtare.