Ndonëse Austria kishte hequr tatimin mbi trashëgiminë në vitin 2008, kjo çështje është riaktualizuar pas propozimeve nga akterë politikë për ta rishqyrtuar atë ose për të marrë mendimin e qytetarëve përmes një referendumi, raporton Die Presse.
Mbështetësit argumentojnë se tatimi mbi trashëgiminë mund të promovojë drejtësi më të madhe sociale duke reduktuar pabarazinë në pasuri, dhe duke siguruar që trashëgimitë e mëdha të kontribuojnë në financat publike. 

Organizatat si Dhoma e Punës dhe partitë politike siç janë Partia Socialdemokrate dhe të Gjelbrit e shohin këtë si një mjet për përmirësimin e drejtësisë tatimore dhe forcimin e sistemit të mirëqenies sociale.
Sipas të përditshmes austriake, Die Presse, kundërshtarët, përfshirë Partinë Popullore Austriake (ÖVP) dhe përfaqësuesit e biznesit, paralajmërojnë se tatimi mbi trashëgiminë mund të ndikojë negativisht në bizneset familjare dhe konkurrueshmërinë ekonomike të Austrisë.  

Ata argumentojnë se taksimi shtesë mund të krijojë barrë financiare dhe të dekurajojë investimet dhe vazhdimësinë e bizneseve.
Në përgjithësi, debati pasqyron një konflikt më të gjerë midis barazisë sociale dhe stabilitetit ekonomik. E ardhmja e tatimit mbi trashëgiminë në Austri mbetet e pasigurt dhe mbetet një çështje kyçe politike, raporton Die Presse. 

Tatimi mbi trashëgiminë është një taksë që aplikohet mbi pasuritë (si para, prona ose biznese) që një person u lë trashëgimtarëve të tij ose saj pas vdekjes. 

Përfitimi kryesor nga vënja e kësaj takse është se mund të promovojë drejtësi sociale dhe të gjenerojë të ardhura publike, ndërsa disavantazhi është se mund të krijojë barrë financiare për familjet dhe bizneset familjare që i trashëgojnë këto pasuri.