Në hapësirën inovative të performancës NEST- Neue Staatsoper im Künstlerhaus në Vjenë, adaptimi i Peçit Mein erster Nussknacker (Arrëthyesi im i parë) fton publikun e ri, të moshës 6–10 vjeç, të hyjë në një botë magjike ku muzika klasike dhe lëvizja bashkëkohore bashkohen natyrshëm.

Mein erster Nussknacker risjell partiturën e njohur të Çajkovskit përmes një këndvështrimi të përmbledhur, me nota humori dhe qasje bashkëkohore. 

Ngjarja zhvillohet në një dyqan arrash dhe çokollate, ku fëmijët nisin aventura emocionuese përplot gjallëri, duke u përballur madje edhe me hajdutë, të udhëhequr nga Drosselmeyeri misterioz dhe Klara. 

Vepra sjell në skenë nxënësit dhe kompaninë rinore të Akademisë së Baletit të Operës Shtetërore të Vjenës, duke u ofruar atyre një mundësi të rrallë dhe frymëzuese për të performuar në një kontekst të rëndësishëm artistik.

Premiera do të mbahet më 25 mars, ndërsa shfaqjet do të vijojnë më 26 dhe 27 mars 2026. Ky interpretim plot hijeshi ndërthur muzikën ikonike me koreografi dinamike, duke i udhëhequr spektatorët e vegjël drejt një dashurie të përjetshme për baletin. Duke krijuar një vepër të dedikuar për fëmijë dhe të interpretuar nga talentë të rinj të vallëzimit, Peçi thekson rëndësinë e kultivimit të kureshtjes artistike dhe angazhimit kulturor që në moshë të hershme.

Në këtë mënyrë, Mein erster Nussknacker jo vetëm që ringjall botën e Çajkovskit, por gjithashtu feston brezin e ardhshëm të artistëve dhe publikut, një vizion që rezonon thellësisht në peizazhin e pasur kulturor të Vjenës dhe më gjerë.

“Do të bazohem në traditën klasike, me interpretimin tim bashkëkohor. Muzika do të jetë klasike, por e interpretuar ndryshe,” është shprehur Peçi në një intervistë për HAJDE.

Vepra e tij përfaqëson një ndërthurje të klasikes me bashkëkohoren. Koncepti, ideja dhe organizimi i muzikës janë tërësisht të tijat.

Peçi, i cili është formuar në Akademinë e Baletit në Tiranë dhe në Shkollën e Baletit të Operës Shtetërore të Vjenës përpara se të bëhej një figurë udhëheqëse në Baletin Shtetëror të Vjenës, është vlerësuar prej kohësh për aftësinë e tij për të ndërlidhur traditën klasike me perspektiva të reja artistike.

Karriera e tij, e shënuar nga çmime ndërkombëtare dhe vepra koreografike novatore, mishëron përkushtimin ndaj ekselencës dhe çasjen në artin e vallëzimit.