Këtë të shtunë katër skiatorë humbën jetën pasi një ortek goditi një grup prej shtatë skiatorësh jashtë pistës në majën Finsterkopf, në lartësinë 2.150 metra, në Luginën Grossarl në rajonin e Salzburgut, kanë thënë ekipet e shpëtimit. Pjesëtarët e tjerë të grupit kanë pësuar lëndime të rënda. Ditë më parë, gjithashtu një grua është mbytur nga një ortek bore në zonën e afërt të Bad Hofgastein, ka raportuar The Guardian.

Më vonë gjatë ditës së djeshme, tre skiatorë çekë humbën jetën si pasojë e zënies nga një ortek bore në komunën Pusterwald në Styria. “Pavarësisht përpjekjeve të menjëhershme të shpëtimit, tre personat u gjetën pa shenja jete,” tha policia në një deklaratë, duke shtuar se katër shokët e tyre janë evakuuar dhe kanë marrë ndihmë mjekësore.

Autoritetet paralajmërojnë se situata mbetet “kritike” pasi 20 deri në 50 centimetra borë e re ka ranë mbi shtresa më të vjetra të lidhura dobët, duke rritur rrezikun e ortekëve të tjerë. Një ortek i ngjashëm fatal u raportua të premten në Zvicër, ku humbi jetën një shtetas gjerman.